KENT ARCHAEOLOGICAL SOCIETY  -- RESEARCH    Studying and sharing Kent's past      Homepage

Medieval & Tudor Kent Wills at Lambeth - Book 21  Page 51

Edward GILDEFORD,  Will 16 October 1448

Return to Book 21 Contents Page      Return to Lambeth Wills Index Page

In the name of god almighty so be it ye yere of owre lord a thousand fowre hundred and xlviijti the xvj day of Octobr and the Reigne of Kyng Henry the sixte the xxvij yere y EDWARD GILDEFORD in my good mynde and good hele of body ordeyne and make my testament in these wordes Furst y bequethe my sowle vnto Almight Jhu onto his moder oure lady seynt Marye and to al the blessid saynts in heuene And my body to be bered afore the auter in ye myddis of my chappell at Rowynden [ Rolvenden ] chirch y clepid Saynt Anne and Seynt Katerine chauncell. Also y bequethe to the high auter of the said church vjs viijd also y bequethe to the said chirch in the worship of God xls for a boxe y gilt of coper wt a tabernakele to hange ynne goddis body aboue the auter. 
Also y bequethe to the high auter of Tenterden iijs iiijd. To the high auter of Benynden [ Benenden ] vjs viijd of Bedynden iijs iiijd of Ebbene iijs iiijd. To the viker of Rolvynden vjs viijd to the sexteyn xxd. To euery godchild that y haue lyving gentilman or a gentilwoman iijs iiijd. To euery other godchild of myn xxd. To euery pouer man that holdeth a torche at my monthes mynde haue a gowne vjd and his mete. To viij men that beryn my body to chirch euery of hem 12d. Also y wol that euery pouere man that cometh to pray for my sowle at myn outeberyng monthes mynde and xij monthes mynde euery of hem haue ijd and his mete. 
Also y bequethe to the covent of Crists Chirch at Caunterbery xls to the couvent of Seynt Radegundis xxs. To the Freris of Lyssenham xiijs iiijd. Also I wol that Syr John Stopyng haue xxs to pray for my sowle. I will myn executors dispose euery yere duryng vij yere xls in almasse. 
To the prisoners of the castell of Caunterbery and to the poueryst men of the parysshes of Rolvynden, Benynden, Tenterden and Ebbene [ Ebony ]¼ Also I wol that John of the Bakehouse haue vjs viijd. Also that Stephen Gybon and John Ewyn haue euery of hem a cowe or viijs and euery seruaunt that ben vnrewarded beyng wt me at my decesse be rewarded after discreccon of myn executors. Also y wol that myn gownes that be nought furred wt widdeware be departed among my seruants anyseth always that Thomas at Herste haue a gown and iijs iiijd. Also y wol that myn executors do synge for my sowle wt in the monthes day V hundred masses geuyng euery prest ijd. Also y wol that Residuys of the torches at haue ye brente aboute myn herse that two of hem be delyueryd to Egethorn [ Eythorne ] Chirch and ij to Syberdysweld [ Sibertswold ] chirch and ij to Ebbene chirch. 
The Residuys to abyde to the worship of God in Rolvynden chirch. Also y wol that ye costerys of the hall the costerys of the parlor and the bedde for the gret chambr wt al the apparell abyde full to my manor of Halden. And al the Residuys of the instore y wol that it be departed bitwene Julyane my wyf and John my sone. Also y wol that Juliane my wif haue the furst choise of al the residuys of my goodes y yeue and bequethe to Julyane my wyf John my sone and William Darell and they to dispose for my soole as hit semeth vnto hem to the plesaunce of God and to the helthe of my sowle. The same Julyane my wyfe John my sone and William Darell y ordeyne and sette my feithfull executours to fulfylle this my last Wille. Also y ordeyne Richard Waller and John Waller ouerseerys. 
Proved 21 September 1449 and administration granted to our beloved in Christ John son and executor of deceased with reserved power for the others and on 8th October executors released. (175b Stafford)

Return to Book 21 Contents Page      Return to Lambeth Wills Index Page

Back to Wills Introduction   Back to Library and Visual Records   Back to Research         Back to Homepage

This site is hosted by Medway Internet      Kent Archaeological Society is a registered charity number 223382
© Kent Archaeological Society 2003     

This website is constructed by enthusiastic amateurs.  Any errors noticed by other researchers will be to gratefully received so
 that we can amend our pages to give an accurate record as possible. Please send details too research@kentarchaeology.org.uk